ကင်ဗက်ခရူးဆိတ်၊ခရစ်တော်သံအမတ်များ - ပေါလ်ခေကျိုင်း (Rev, Th.D)

ပေါလ်ခေကျိုင်း (Rev, Dr Paul Khay Kyaing)

သက်သေခံချက်
ငယ်စဉ် အမွှာမွေးရာ၊ အမဖြစ်သူ အသက်ရှင်ပြီး၊ နောက်မှမွေးသည့် သူအသက်မရှိတော့။ ထုပ်ပိုး၊သဂြိုလ်ရန်အချိန်တွင် ဓမ္မဆရာတဦးရောက်လာပြီး၊ ရေနွေး၊ရေပတ်တိုက်၊ လေမှုတ်၊ ဆုတောင်းပေးခြင်းဖြင့် အသက်ပြန်ရှင်လာခဲ့သော ကျွန်တော်ဖြစ်သည်။ ချင်းတောင်တွင် ကြီးပြင်းခဲ့ပြီး ရန်ကုန်သို့ ရောက်လာခဲ့သည်။

ငယ်စဉ်က ပြည်ပအစိုးရ (ဦးနု) ၁၉၆၉ ဖြင့် ဘန်ကောက်မြို့တွင် လုံခြုံရေးတာဝန်ခံလုပ်ခဲ့သည်။ ထိုစဉ်တွင်ပင် ပြောင်းလဲခဲ့ပါသည်။ ခရစ်တော် ရရှိတိုင်း ပြောင်းလဲမှု၊ ချက်ခြင်း မဖြစ်ပါ။ တော်လှန်ရေး ၈နှစ်လုပ်ပြီး၊ လွတ်ငြိမ်းချမ်းသာခွင့်ဖြင့် မြန်မာပြည်ပြန်ရောက်လာခဲ့သည်။ ၃နှစ် မြန်မာပြည်ကွန်မြူနစ်၊ ရှမ်းပြည်တွင် ထောက်လှမ်းရေးတာဝန် ထမ်းဆောင်ရသည်။ သို့သော် ထိုနေရာ လားဟူဒေသတွင် ၃နှစ် နေခဲ့ပြီး၊ တောင်တန်းများကြားတွင် ကျမ်းစာတအုပ်ဖြင့် ခရစ်တော်အမှုတော်ဆောင်ခွင့်ရခဲ့ပါသည်။ လားဟူစာနှင့်စကား တတ်မြောက်ခဲ့သည်။ မိမိလူငယ်တဦးက မယုံကြည်သူ မိခင်ကြီး သေဆုံးသွားပြီး၂ရက်အကြာ၊ လူငယ်၏ မရမကတောင်းဆိုမှုကြောင့်၊ မတတ်သာပဲ ဆုတောင်းပေးခဲ့ရသည်။ အံ့သြဘွယ် အေးစက်နေသူ မိခင်အသက်ပြန်ရှင်ထထိုင်ခဲ့ရာမှ (ချောင်းကြည့်သူများထွက်ပြေး၊ ခင်ပွန်းသည်လည်းပြေး) မိခင်ဖြစ်သူက လမ်း၂သွယ်ကို တွေ့ခဲ့ကြောင်း၊ မယုံကြည်သူများအား ပြန်ပြောပြရန်အတွက် အသက်ပြန်ရှင်ကြောင်း ပြောပြပါသည်။ ရိုးရာနတ်စား၊ လားဟူရွားသားများ ခရစ်တော်ကို ယုံကြည်လာခဲ့သည်။


ခရစ်တော်အတွက်သံအမတ်
မိမိဇနီးသည်သည် ဂျာမဏီအမျိုးသမီးဖြစ်သောကြောင့် ဂျာမဏီသံရုံးညစာပွဲတွင် ဖိတ်ကြားခံရလေ့ရှိသည်။ သူတို့ထုံးစံအရ အမဲရောင်ဝတ်စုံဖြင့် တက်ရောက်စဉ်၊ မြန်မာ ဒေါက်တာ Ph.D ရသူက တဦးက အစားမစားမှီ၊ မိမိဆုတောင်းသည်ကို မေးမြန်းသည်။ ၂၀၁၀တွင်ဖြစ်သည်။ သူက မမြင်ရသောဘုရားကို ကိုးကွယ်ခြင်းအတွက် အခြေတင်မေးလာပါသည်။ မိမိကိုလည်း သူ၏ဇနီး၊သား၊သမီး များ ဂျာမဏီတွင်ရှိသည်ဟု ပြောရာ၊ မိမိက မမြင်ရသောကြောင့် ကျွန်တော်မယုံပါ ..ဟု အခြေအတင်ပြောလိုက်သည်။  သူ့ကို လွန်ခဲ့တဲ့နှစ်၂၀၀၀ က ခရစ်တော်ရှိခဲ့တာကို ယုံသလား မေးသောအခါ သူက ယုံသည်ဟု ဆိုပါသည်။ မိမိက အခြားအသက်ရှင်သော နပိုလီယံ၊ ဟစ်တလာ စသဖြင့် မြင်ရသောသူများ၏ နောက်လိုက်များ ယခုအခါ ရှာမတွေ့တော့။ ခရစ်တော်နောက်လိုက်များမှာ တိုးပွားနေဆဲဖြစ်ကြောင်း ပြောပြခဲ့ပါသည်။

မြန်မာပြည်တွင် နိုင်ငံခြားသံအမတ်များ စုစည်းသောအခါ လာရောက်ပါဝင်သူ မိမိအား ဘယ်နိုင်ငံက သံအမတ်လဲဟု မေးသည်။ မိမိက ခရစ်တော်ရဲ့ သံအမတ်ပါဟု ဖြေလိုက်ပါသည်။ ထို သံအမတ်များ နေထိုင်သောနေရာသည် အလွန်သာယာသည်။ မြန်မာပြည်သားများကို မိမိတို့နိုင်ငံ၊ သာယာ၊ ကောင်းမြတ်ကြောင်းများကို လာရောက်ပြောကြား၊ ပြသရန် မြန်မာပြည်သို့ ရောက်လာသည် ..ဟု ဆိုပါသည်။ မိမိတို့လည်း ခရစ်တော်၏ သံအမတ်များ၊ သံတမန်များဖြစ်သောကြောင့် ခရစ်တော်ကောင်းမြတ်ခြင်းများကို ပြောပြ၊ သက်သေပြရန် လိုပါသည်။

ဆရာဦးတင်မောင်ညိုက မြန်မာပြည်အသုဘတခု (ဦးဝင်းမောင်) တွင် ဟောကြားရာ၊ ခရစ်တော်ကို ယုံသူများသည် သေလျှင်၊ ယေရှုကဲ့သို့ အသက်ပြန်လည် ရှင်ရမည်။ အိုနာသေခြင်းမရှိပဲ သာယာသော ခရစ်တော်နိုင်ငံတွင် ထာဝရနေရမည်ဖြစ်ကြောင်း ပြောသောအခါ၊ အခြားဘာသာဝင် အဖိုး၊အဖွားများသည် သူတို့ပင်လျှင် ခရစ်တော်ခေါ်တော်မူခြင်းကို ခံလိုပါသည် ..ဟု ရင်ဖွင့်ပြောဆိုလာကြသည်။

မိမိတို့အသက်ရှင်စဉ်အသက်တာ
ယခင်က မိမိတို့အသက်ကို ၁၂၀ ဟု ဘုရားက သတ်မှတ်ခဲ့သည်။ ကမ္ဘာဦးက အသက် ၉၀၀ကျော် နေထိုင်ကြသည်။ ဆာလံ ၉၀တွင် အသက်၇၀ သက်မှတ်ထားပြန်ပါသည်။ ယခုအခါ ၇၀နှစ်သာ ဖြစ်သည်။ ကျွန်တော် အသက်၅၀ကျော်ပြီး၊ အချိန်မရွေး သေနိုင်သည်။ တိုတောင်းသော အချိန်အတွင်းတွင် ဘာလုပ်ကြမည်နည်း။

ကျွန်တော်မှာ ခရစ်တော်ရရှိပြီး ခြေစုံပစ် အမှုတော်သို့ဝင်သွားသည်မှာ ၃၅နှစ်ရှိပြီ ဖြစ်သည်။ အမျိုးသမီးများလည်း တရားဟောဆရာများကို အိမ်ထောင်မပြုလိုကြပါ။ လောကဆင်းရဲများကို မခံနိုင်သောကြောင့်ဖြစ်သည်။ သို့သော် လယ်ကွင်းထဲတွင် စပါးများ မှဲ့နေပါသည်။ စပါးရှင်ထံဆုတောင်းပြီး ရိတ်သိမ်းရန် လိုအပ်နေပါသည်။

တရုပ်ပြည် သာသနာပြုဆရာကြီး ဟတ်ဆန်တေလာက ဆုတောင်းသည်။ နောက်ဆုံး ဘုရားသခင်က သူ့ကို ကိုယ်တိုင်ပါဝင်ရန် လွှတ်ပါသည်။ အင်္ဂလန်နိုင်ငံ ဆရာဝန်၂ဦး၊ တရုပ်ပြည်တွင် ရှန်ကေရှိတ်အုပ်စိုးစဉ် တရားဟောရင်း၊ ဆေးကုပေးသည်။ မနှစ်သက်သူများက သူတို့ဆေးကုနေရာကို မီးရှို့ပစ်လိုက်ပြီး၊ အင်္ဂလန်ပြန်ရတော့မည်လား .. အခြေအနေဖြစ်လာသည်။ သို့သော် ရှန်ကေရှိတ် စစ်သားများကို ဆေးကုသပေးသည်။ ထိုအခါတွင် တရုပ်ပြည်အကြီးအကဲဖြစ်သူ ရှန်ကေရှိတ် ကိုယ်တိုင် သိရှိ၊ ခံစားရပြီး ခရစ်တော်ကို လက်ခံလာခဲ့သည်။ သူတို့ ခေါင်းဆောင်ကြီး ကဲ့သို့ တပည့်စစ်သားများစွာ တရုပ်ပြည်တွင် ခရစ်ယာန်ဖြစ်လာခဲ့ရသည်။

ခရစ်ယန်အသက်တာသည်
ခရစ်တော်အားဖြင့်သာဖြစ်သည်။ ခရစ်တော်တန်ခိုးပြရန်မှာ ၀န်ခံရမည်။ ရှင်ပေါလုက နေ့တိုင်း သေသည်။ မိမိရှိသော အသက်၊စည်းစိမ်များကို စွန့်လွှတ်ပြီး ခရစ်တော်ကဲ့သို့ သေရသည်။ ခရစ်တော် မေတ္တာသည် အကန့်အသက်မရှိပါ။ မိမိတို့ မေတ္တာသည် အကန့်အသတ်ရှိပါသည်။ မိမိ ကင်ဗတ်ခရူးဆိတ် ကျမ်းစာ Teaching လုပ်နေစဉ် သားဖြစ်သူ သင်တန်းသားအတွက် မိခင်ဖြစ်သူက မိမိပါးကို ရိုက်သွား၍၊ ခရစ်တော်၏ နောက်ပါးတဖက်ကို ရိုက်ရန်စမ်းသပ်ခဲသည်။ သင်တန်းသားလူငယ်၏ မိဘများ ခရစ်တော်၏ ကြီးမားလှသောမေတ္တာကို လက်ခံခဲ့ကြပါသည်။

ဘာကြောင့် ကျွန်တော်တို့ကို လောကတွင် ထားရပါသလဲ။ ... ခရစ်တော်အတွက် အသက်ရှင်ရန် အတွက် ဖြစ်ပါသည်။ ၀ိညာဉ်အသက်ရှင်ဖို့ လိုပါသည်။ သူများကို ကူညီဖို့၊ မေတ္တာပြဖို့ နှင့် ခရစ်တော်ဘုန်းတော်ထင်ရှားစေဖို့ဖြစ်ပါသည်။

ဆုတောင်းခြင်းဖြင့် ဓမ္မဒေသနာအဆုံးသတ်ပါသည်။

မုရန်မဂ္ဂဇင်း မှ ကူးယူဖော်ပြပါသည်။